Skryfwenke deur Carla van der Spuy

Wenke vir voornemende skrywers:

Moenie jou manuskrip vir jou ma/beste vriendin/huweliksmaat of kinders gee om te lees nie. Hulle gaan mal daaroor wees want hulle hou van jou.


Uitgewers is baie eerlik en objektief. Hulle moet ‘n bestaan uit die verkoop van boeke maak, onthou. Dus sal hulle nie honderde duisende rande se uitgawes aangaan as die eksemplare gaan stof vergader nie. Niemand het ‘n kristalbal nie, maar hulle kan min of meer voorspel wat gaan verkoop.


Indien jou manuskrip afgekeur word, stuur dit na die volgende uitgewer toe. Die manuskrip vir Gone With the Wind is glo meer as 50 keer afgekeur voor dit uiteindelik gepubliseer is en ‘n trefferfliek gemaak is.


Woon skryfskole en slypskole by waar jy praktiese raad ontvang en jou werk bespreek gaan word. Skrywers wat boeke gepubliseer het word dikwels oorval deur voornemende skrywers om te help, maar dit is uiters tydrowend .


Wees bereid om baie navorsing te doen; selfs al skryf jy fiksie. Gestel jy wil misdaadfiksie skryf, sal dit wys wees om soveel niefiksie boeke as moontlik oor misdaad te lees. Daardie skrywers het jare lank navorsing gedoen en gewoonlik is dit goed genoeg om net die bron te noem en na die skrywer en titel te verwys. Dis egter goed om hulle in die saak te ken.


Wees ook bereid om jou manuskrip oor te skryf tot die uitgewer gelukkig is. Ek weet van bekende krimiskrywers wat 20 jaar lank gespook het voor hulle iets gepubliseer het en ander wat hul manuskripte al 5 keer moes oorskryf.

One thought on “Skryfwenke deur Carla van der Spuy

Lewer kommentaar