Flaters

Deur Antoinette Venter
So begaan ek nou die dag een van die grootste flaters wat ’n wannabe skrywer kan begaan – of altans só reken die Facebook taal-polisie.

Ek is besig om vir die honderdste maal verveeld deur my e-posse te blaai terwyl ek wag om die taksman se gesant te spreek wanneer die e-pos waarvoor ek as aspirant skrywer so lank my tande slyp deurkom – ons aanvaar jou kortverhaal vir plasing. Maggies maar jy is oulik! Klop ek myself op die skouer en in my waas van euforie gryp ek my Samsung nader. Die nuus moet ek nóú met die wêreld deel. En dit is net daar waar ek toe die ding aanvang. Met bewende vingers tik ek op my Facebook-blad, nogal op ’n helder pers agtergrond (en ek haal die presiese woorde aan.) Sopas gehoor hulle het my kortverhaal vir plasing aanvaar . . . blah; blah; blah . . .

Die res van die dag sweef ek op ’n wolkie van geluk. Ek vererg my nie eens toe die taksman se gesant my na twee ure se gewag in die ry onverrigte sake terug stuur nie. Op die stadium is ek nog heeltemal onbewus van die taboe wat ek gepleeg het . . .

By die huis aangekom lees ek deur al die kommentare op my Facebook plasing en met elke “mooi” “pragtig” “oulik” swel my kop nog ’n bietjie meer. En toe sien ek die gewraakte kommentaar: “in my dae is so pas as twee woorde gespel.” Ek voel sommer hoe ek koud word. Die persoon kon net sowel gesê het: “Jy wil stories skryf, maar jy kan nie eens so pas reg spel nie. Hoe lyk die verhale wat jy die wêreld instuur? Seker vol taal- en spelfoute.”

“Berge val op my en bedek my,” prewel ek saggies by myself terwyl ek soos ’n verwoede leeu op die internet rondsoek of ek nie iets kan vind wat mens die groen lig gee om so pas maar as een woord te skryf nie. Het die AWS nie iewers al besluit dat enige van die twee weergawes reg is nie? Nee! Ek is in my kanon in. Daar is nêrens ’n weggesteekte reël wat my uit die penarie gaan red nie. Ek oorweeg dit vir ’n oomblik om my foon se autocorrect die skuld te gee. Gelukkig onthou ek betyds dat ek so week of twee gelede ook iets in helder pers uitgeblaker het wat die gewraakte woordjie of altans twee woorde bevat. Ek blaai met ingehoue asem af. “Asseblief, sê vir my ek het dit op die vorige geleentheid reg gespel,” stuur ek ’n nood gebedjie op. Helaas nie. En só is my autocorrect verskoning ook daarmee heen en ek besluit om vir eers die kommentaar te ignoreer. Hier sal ek moet mooi dink om uit die penarie te kom.

Teen die tyd wat manlief van die werk afkom is ek briesend. “Wie de ongeluk dink die oom is hy? Hy is nie eens op my vriende lys nie!” tier ek in my arme niksvermoedende wederhelf se ore, “ek gaan vir hom sê dink hy as mens ’n storie wil skryf dit maak van jou ’n blerrie taalkenner? Ek het belasting geswot, nie tale nie. In elk geval, voor ’n storie geplaas word, word dit eers geredigeer en geproeflees.” Eintlik in retrospektief gesien, was ek nie naastenby so kwaad vir die oom wat die kommentaar gelewer het as wat ek vir myself was nie . . .

Manlief laat ook nie op homself wag nie en gaan beantwoord die man se kommentaar, iets in die lyn van: “Ag sjame, is dit lekker om ander mense aan te val?” Net daar besef ek. Hier gaan nou ’n oorlog op my blad uitbreek en ek delete my man en die oom se kommentaar. Ek stel die gewraakte woord reg en edit die plasing sodat net my Facebook vriende dit kan sien. Probleem opgelos.

In retrospektief gesien. ’n Mens maak foute op al die gebiede in die lewe. Dit is nie die einde van die wêreld as mens ’n fout begaan het nie solank mens daaruit kan leer (ek sal nóóit weer so pas verkeerd spel nie.)
Al wat ek wens is dat mens alle foute in die lewe net met ’n delete knoppie kon regstel.

Ns. Alhoewel ek ’n HAT, AWS en Pharos besit is die skrywe hierbo moontlik vol foute. Jammer daaroor.

8 thoughts on “Flaters

  1. riafourie says:

    O my vy!!! Ek het so pas agtergekom dat ek sopas ook so skryf…dis n woord waaraan mens nie tweekeer dink nie….eish, nou wonder ek oor waaraan en tweekeer….lol!!!of liewer in korrekte Afrikaans – LUL – lag uit luid!!

  2. amandacl says:

    Antoinette, ek sal opsluit ook woordeboeke moet raadpleeg na dese! Ek het jou eerlikheid en humor só geniet. Dit maak beslis nie afbreek aan jou duidelike vermoeë om n storie te vertel nie. Terloops, my internet lê onderstebo, dus kan ek jie moeiteloos die spelling van vermoeë toets nie 😍

  3. Hendie says:

    As jy nie ‘n woord op ten minste twee verskillende maniere kan spel nie, het jy geen kreatiewiteit nie….(laat dit jou verweer wees as mense jou weer kap!)

  4. Ronel says:

    Ai, ek het lekker gegiggel. Ek is ook maar dwars wanneer dit by spel en taalfoute kom, maar sopas het net gebeur omdat jy vinnig getik het … As ek my spasiebalk druk met my linker duim, wil dit nie werk nie, ek moes myself kondisioneer om dit met die linkerhand te doen. My R-sleutel maak my ook deesdae moerrrig, want vir een of anderr rrede bly dit twee rrrrre tik – ek dink dis ouderrdom …

Lewer kommentaar